Part I
Khoon ke pool me pada hua mujhe apni kismat par bahut rona aa raha tha.. Ek taraf meri biwi ki laash padi hui thi.. Aaj hamari shaadi ki suhaagraat thi aur aaj hi ke din wo hua jo main sapne me bhi soch sakta tha.. Mujhe apni pichli zindagi yaad aane lagi..

"Hello, tum Prem ho naa..?" ek surili aawaz mere kaano me padi.. Maine sir utha kar dekha to mujhe apni aankhon par vishwas nahi hua.. Mere saamne wo ladki khadi thi jiske oopar college ka har ladka marta tha.. Par jaisa ki har kahani me hota hai.. Wo ladki kisi ko ghaas bhi nahi daalti thi.. Dekhne me bilkul kisi pari jaisi thi.. Shareer ki banawat aisi ki achche achchon ki chutti kar de.. Main kisi but ki taraah use dekhe jaa raha tha.. "Maine kuch pucha aapse..?" Usne meri aankhon ke aage haathon ko nachate hue kaha.. Uske achanak aisa karne se main bilkul hadbada gaya.. Aur jis kursi par baitha tha usse girte hue bacha.. Ye dekhkar wo zor zor se hansne lagi.. Wohi ek hasi thi jo mera dil le gayi thi.. Aur wohi hasi aaj maine fir suni thi.. Wohi hasi meri biwi ki maut kaa kaaran bhi bani thi.. "Ji haan Main Prem hun.."Maine apni gardan ko haan me hilate hue kaha.. "Aur main hun.." "Chaya" Wo abhi apna wakya pura bhi nahi kar paayi thi ki main uske beech me hi bol pada.. "Aap mujhe jaante hain..?" usne mujhe ajeeb nazron se dekhte hue kaha.. Jaise maine kitna bada raaz use batane jaa raha hun.. "Aapko kaun nahi janta madam..?" Maine chatkaare lete hue kaha... Ye sunkar wo bilkul sharma gayi.. Maine sun rakkha tha ki wo bahut nakchadi hai.. Par pata nahi wo mujhse kyun itne achche se pesh aa rahi thi.. Main Prem Singhania pure college ka sabse achcha student tha.. Hum log IIT kanpur me padh rahe they..aur main hameshaa unn sab me awwal aata tha.. Shayad use padhayi ke silsile me hi meri madad chahiye thi... "Ji mujhe aapki madad chahiye padhai ke silsile me.." jaisa expect kiya tha waisa hi usne kaha.. "Ji jo aap chahen.." Maine sahmati me sir hila diya.. Aur main uski madad karne laga.. Use kuch problems they jo maine chutki me use samjha diye.. "Thankyou Prem.. Tumne meri madad ki.." Usne mujhe dhanyawaad karte hue kaha.. "Par main to kisi aur firaak me tha.. "Nah bas Thankyou se kaam nahi chalega.. Aapko mera ek aur kaam karna padega..""wo kya..?" "Mujhse dosti karni padegi...?" Aur yahin maine apne jeevan ki sabse badi galti kar di.. Jiski saza mujhe zindagi me aage chalkar milne wali thi...

Din bitte gaye... Pure college me main akela ladka tha jo Chaya ka dost tha.. Sabhi ladke mujhe dekhkar mujhse jalte they aur main Chaya ko apne saath paakar bada garv karta tha.. Aakhir meri lottery jo lagi thi.. Dhire dhire.. Hamari dosti pyaar me badal gayi.. Bahut pyaar karne laga tha main Chaya se.. Aur wo to mujhse aur bhi jyada pyaar karti thi.. Duniya jahan ka pyaar mujhpar lutati thi... Wo mere liye apni jaan bhi dene ko taiyyar thi..

Aakhirkar humne apni degree le li.. Aur bade MNC me ek achche pad par naukri karne lage.. Ab samay aa gaya tha ki hum ek atoot bandhan me bandh jaayen.. Humne jald hi shaadi karne ka faisla kar liya.. Hamare gharwalon ko bhi isse koyi problem nahi thi.. Aur phir hamare engagement aur shaadi ki taarikh bhi pakki ho gayi.. Aur wo din aa gaya jis din hamari sagai honi thi.. Bahut Saare mehmaan aaye hue they.. Sabhi hamari jodi dekhkar bade khus they aur baar baar duwaein de rahe they.. Aakhirkaar mangni ki rasham shuru hui.. Maine uska haath lete hue uski anguli me anguthi daali aur uske haathon ko chum liya.. Sabhi oor taaliyan bajne lagi.. Phir usne mera haath lekar usme anguthi pahnate hue wo wakya bola jiske kaaran meri aaj ye haalat hui hai... "Prem...I love you.. Tum sirf mere ho aur mere hi rahoge.. Meri aatma hameshaa iss anguthi ke zariye tumhare saath rahegi.." ye chand lafz sunkar mujhe uss samay to bahut khusi hui thi par aaj ye lafz hi mere liye shaap ban gaye they.. Aur iske kaaran hi meri nayi naweli dulhan maari gayi thi..

Hamari mangani ke do din baad hi mere phone ki ghanti baji aur mujhe khabar mili ki Chaya ek car accident me maari gayi.. Ye mere liye ek bade sadme se kam naa tha.. Mera dimag bilkul sunn ho gaya aur main kisi paagal ki tarah hi behave karne laga.. Par kehte hain naa ki waqt har zakhm ko bhar deta hai... Mere saath bhi aisa hi hua.. Dhire dhire main apni zindagi me aage badhne laga..aur Chaya ki yaadon ko apni zindagi se puri tarah mita diya.. Par kya abhi bhi mita paya tha main uski yaadon ko..? Nahi.. Maine uski ek yaadgar aaj bhi sambhal kar rakkhi thi.. Wo engagement Ring.. Laakh koshishon ke baad bhi main use khud se dur naa kar paya..

Isi dauraan meri mulaakat hui Sneha se.. Wo bhi kisi pari se kam naa thi.. Phir wahi hua.. Pyaar aur phir shaadi..

PART II
Aaj hamari shaadi ki suhaagraat thi... Sneha ko sab pahle hi mere kamre me chhod aaye they.. Mujhe bhi ghar ki aurtaein khich kar le gayi kamre ke paas aur andar dhakel diya.. Aur hanste hue chali gayi..
Maine kamre me ghuste hi Sneha ki taraf dekha.. Wo foolon se saze bistar par ghunghat odhe baithi hui thi.. Uske jewar halki roshni me chamak rahe they.. Pura kamra foolon se saza hua tha.. Main dhire dhire Sneha ki taraf badhne laga.. Aur bistar ke paas pahunch gaya.. Main dhire se bistar par baith gaya.. Aur uska ghunghat uthaane laga.. Jaise hi maine ghunghat uthaya meri bolti band ho gayi.. Andar koyi aur nahi balki Chaya thi.. Meri ruh andar tak kaanp uthi.. "Kya socha tha tumne Prem..? Tum kisi aur ke ho jaaoge aur main tumhein rokne nahi aaungi..?" uski aawaz me ajeeb sa thandapan tha.. Pure kamre me thand badh gayi thi.. "Dekh lo Prem.. Ab maine iska shareer le liya hai... Tum ab sirf mere ho Prem.. Hamehshaa ke liye mere hi rahoge..." ye bolkar wo jor jor se hansne lagi.. Theek waise hi jaisa wo pahli mulaakat me hansi thi.. Par tab ki aur abhi ki hansi me zameen aasmaan ka fark tha.. Aaj uski ahnsi badi darwani lag rahi thi... Pura maahol darwana ho chuka tha... Kamre ki lights apne aap jalne bujhne lagi.. Zoron ki hawa chalne lagi kamre me.. Thand ke maare mere haath paanw kanpne lage.. Tabhi maine dekha ki wo meri taraf aa rahi hai.. "Chaya.. Main ab tumhara kabhi nahi ho sakta.. Tum ab dusri duniya se ho... Main ab Sneha se pyaar karta hun..." Maine darte darte apna wakya pura kiya... "Kya kaha...? Tum Sneha se pyaar karte ho... Hahahaha... Jab Sneha rahegi hi nahi to tum kya pyaar karoge usse... Ye kehte hue usne apni gardan piche ki taraf madod di... Aakhir tha to wo Sneha ka hi shreer.. Usse khoon ki ganga Jamuna bahne lagi... Aur phir wo Shareer gir gaya.. Aur usse Chaya ki aatma bahar nikalkar meri taraf badhne lagi... "Prem, aaj main tumhein markar apni duniya me le aaungi.. Iske baad hum hameshaa saath rahenge.."

"Main aisa nahi hone dunga Chaya..." mujhe samajh aa chuka tha ki wo engagement ring hi saare fasad ki jad hai... Main wo Engagement Ring apne kamre me dhundhne laga... Ek drawer se dusre drrawer... Par wo kahin nahi mil rahi thi.. Aur chaya mere nazdeek aa gayi thi.. Tabhi maine dekha ki wo table ke ek kone par padi thi... Maine jaldi se use uthaya.. Aur apni lighter bhi utha li ..par isse pahle ki main use jalata Chaya ne mujhe uthakar Diwar ki taraf uchaal diya... Mer a sir fat gaya aur usse khoon nikalne laga... Phir bhi main kaise bhi karke khada hua.. Aur paas me pada kagaz ka tukda uthakar usme aag laga di.. Tabtak chaya ne mera ek haath tod diya.. Aur main khoon ke uss pool me gir gaya.. Par girte girte maine wo Ring Aag me fenk di... Aur dekhte hi dekhte wo Ring jal gayi.. Aur saath hi Chaya ka wajood bhi... Par meri uss galti ki saza mujhe mil chuki thi jo maine Chaya se pyaar karke ki thi..
The End